2019 он дуусаж шинэ он эхлэх гэж байгаатай холбогдуулан бид Facebook маркетингдаа анхаарах ёстой 2019 оны статистик үзүүлэлтүүдийг багцлан хүргэж байна.
Статистик №1: Сошиал медиа орчинд ажиллаж буй маркетеруудын 93% нь сурталчилгаагаа Facebook-д байршуулдаг
Сошиал медиа орчинд шинэ, сонирхолтой маш олон сувгууд нэмэгдэж байна. Түүнтэй харьцуулахад Facebook бол хуучин, зарим талаараа сонирхолгүй суваг. Гэхдээ 2019 оны байдлаар хамгийн гол суваг Facebook хэвээрээ байсаар байна. Сошиал медиа орчинд ажиллаж буй маркетеруудын 93% нь сурталчилгаагаа Facebook-д байршуулдаг гэсэн статистикийг хайлтын системийн оновчлолын үйлчилгээ үзүүлдэг Google-ийн Premier Partner, Bing-ийн Elite Partner WordStream компани гаргажээ.
Статистик №2: Facebook хэрэглэгчийн 39% нь бизнес хуудсыг онцгой урамшуулал авахын тулд дагах дуртай
Зөвхөн хуудасны дагагчиддаа урамшуулал зарлах нь хэрэглэгчдийг идэвхжүүлэх аргын нэг юм. Энэ нь жижиг, том бизнесийн алинд ч тохирох урамшуулал билээ. Жишээлбэл Brickhouse Tavern in Williamsburg ресторан зөвхөн дагагчиддаа урамшуулал зарладаг.
Статистик №3: Нийт хуудсанд LIKE дарсан хүмүүсийн 6.4%-д постууд органикаар хүрч байна
Хуудсанд Like дарж, дагасан хүмүүсийн 2%-д нь л постууд органикаар хүрч байна гэсэн цуу 2019 онд тарж байсан. Энэ нь худал мэдээлэл бөгөөд яг үнэндээ 6.4%-д нь постууд органикаар харагдаж байгаа ажээ.
Та хуудасны LIKE-ийн талаар дэлгэрэнгүй мэдээллийг бидний өмнө нь нийтэлж байсан Facebook Page Like: Маркетеруудын мэдэж байх ёстой 5 зүйл нийтлэлээс хүлээн аваарай.
Статистик №4: Facebook сурталчилгааны тайлбар текст 4 үгэнд, линк тайлбар 15 үгэнд багтах нь хамгийн үр дүнтэй
Facebook сурталчилгааны гарчиг богино байх тусмаа хүмүүст илүү хүрч байна. Харин линк холбосон сурталчилгааны тухайд линк доор харагдаж буй тайлбар текст 15 үгэнд багтах нь хэрэглэгчдийг илүү татдаг аж.
Статистик №5: Facebook хэрэглэгчдийн 47% нь зөвхөн гар утаснаас холбогддог
Тийм ээ. Нийт Facebook хэрэглэгчдийн бараг тал хувь нь зөвхөн гар утаснаас холбогддог. Тиймээс бид контентоо гар утаснаас харахад зохимжтой форматтай байхад анхаарах хэрэгтэй.
Статистик №6: Видеог subtitle-тай хийх нь үзэлтийг 12%-аар өсгөдөг
Нийт видео үзэгчдийн 85% нь дуугүй үздэг. Тиймээс бид тэднийг дуугүй үзэхэд зохицох видео контент нийтлэх хэрэгтэй. Үүний нэг арга нь subtitle бөгөөд дуутай тоглуулж буй хүмүүс ч subtitle-тай видеог үзэх сонирхол илүү байдаг аж.
Статистик №7: Видеоны эхний 3 секунд хамгийн чухал
Эхний 3 секунд хүмүүс цаашаа видеог тоглуулах эсэхийг шийддэг. Тиймээс бид видео контентын эхний энэ богинохон хэсэгт үзэгчдийн цаашид үзэх хүслийг өдөөх, хамгийн сонирхолтой хэсгээ байршуулж өгөх хэрэгтэй. Өөрөөр хэлбэл эхний 3 секунд лого гараад дуусаж болохгүй л гэсэн үг.
Статистик №8: Урт постоос богино пост 23%-аар илүү үр дүнтэй
Богино, “амттай” байх зарчим баримтал. Таны нийтэлж байгаа постууд аль болох түргэн хугацаанд хэрэглэгчдийн анхаарлыг татаж байх хэрэгтэй бөгөөд бусад мэдээллээ газардах хуудсаар дамжуулан өгөх нь илүү үр дүнтэй юм.
Статистик №9: Видео пост бусад постоос илүү олон шэйр хийгддэг
Видео хэлбэртэй контент илүү олон шэйр хийгдэж байна. Тиймээс хэрэв та зурган контент бэлдсэн бол түүнийгээ видео контент болгож хувиргаад үзээрэй. Үр дүн нь маш ялгаатай байх болно.
Эдгээр статистик үзүүлэлтүүд бидний 2020 оны маркетингийн төлөвлөгөөнд чухал байр суурь эзлэх болов уу? Таны хувьд 2020 оны Facebook маркетингийнхаа төлөвлөгөөнд эдгээр үзүүлэлтийг хэрхэн тусгаж байгаа вэ?
