Интернэт орчинд хувь хүний мэдээлэл, нууцлалын асуудал тун чухал бөгөөд эмзэг сэдэв гэдэгтэй санал нийлэхгүй хэн нэгнийг олоход хэцүү байх.
Яг энэ асуудал л iOS 14.5 хувилбарт хувийн мэдээллээ бусадтай хуваалцах сонголтыг хэрэглэгчдэд өгөх алдарт шинэчлэл багтах үндэс болсон гэхэд буруудахгүй болов уу. Apple компани энэхүү шинэчлэлийг бүхий л сувгаар өргөн хүрээтэй сурталчилан түгээсэн шалтгаан ч мөн адил.
Маркетерүүд, бизнес эрхлэгчдийн зүгээс авч үзвэл iOS 14-н шинэчлэлийн гол үр дүн Facebook болон Instagram-н төлбөртэй сурталчилгааны кампанит ажлын үр дүнгийн бууралтаар илэрч байгаа. Бүр тодруулбал, iOS 14.5 хувилбар нь үндсэн 3 чиглэлээр Facebook-н сурталчилгаанд сөргөөр нөлөөлж байна гэнэ.
Үүнд:
- Зорилтот сегмент онилох
- Үр дүнг хэмжих
- Сурталчилгааны оновчлол
Та сошиал медиа сурталчилгаа хийдэг бол, угаасаа та энэ нийтлэлийг уншиж байгаа учир хийдэг байх магадлал тун өндөр, дээрх 3 зүйл сошиал медиа төлбөртэй сурталчилгааны үр дүнд тун чухал үүрэгтэй гэдгийг мэдэж байгаа байх.
Бид энэ удаад энэхүү шинэчлэл Facebook төлбөртэй сурталчилгааг хэрхэн өөрчлөж байгаа талаар болон iOS 14.5 шинэчлэл гарснаар сурталчилгааны кампанит ажлаа хэрхэн оновчтой бөгөөд үр дүнтэй хийх ямар өөрчлөлтүүд зайлшгүй хийх шаардлагатай болсон талаарх мэргэжилтнүүдийн зөвлөгөөг хүргэж байна.
iOS 14 шинэчлэл гэж яг юу юм бэ?
Нэг өгүүлбэрээр хэлье гэвэл: Apple компани сурталчилгааны платформууд болон апп хөгжүүлэгчдийн зүгээс хэрэглэгчдийн үйлдлийг бүртгэх, хянах боломжийг эрс хязгаарласан шинэчлэл гаргасан гэж болно.
Мобайл төхөөрөмжүүд суурин компьютерийн интернэт хөтөчийн адил cookies ашигладаггүй. Үүний оронд Apple компани IDFA (Identifier for Advertisers) буюу iOS үйлдлийн системтэй төхөөрөмж бүрт олгосон дахин давтагдахгүй, санамсаргүй ID дугаарыг ашигладаг. Энэ нь хэрэглэгчийн интернэт хөтөчөөс гадна тухайн хэрэглэгчийн ашиглаж буй апп доторх үйлдлийг бүртгэж, хянах үүрэгтэй гэж болно.
Харин 2021 оны 4 -р сарын 26 -нд iOS 14.5 -ийн шинэчлэл гарснаар IDFA -г анхнаас нь идэвхгүй байхаар тохируулсан. Энэ нь юу гэсэн үг вэ гэхээр iPhone хэрэглэгчид аппликейшн бүрт IDFA -г идэвхжүүлэх эсэхээ өөрөө шийдэх ёстой болсон гэсэн үг.
Өөрөөр хэлбэл iPhone хэрэглэгч ямар нэг апп татаж авч ашиглах бүрт доорх зурагт харуулсантай ижил агуулга бүхий анхааруулга харагдах болно гэсэн үг.
Харин шинэчлэл нийтэд хүрснээс хойш хийгдсэн хамгийн эхний судалгаагаар дэлхий нийтээр 17% нь, АНУ -д хэрэглэгчдийн ердөө 10% нь (Flurry) ЗӨВШӨӨРӨХ гэсэн сонголтыг хийсэн гэнэ.
Энэ бол цоо шинэ бодит байдал. Энэ бодит байдал бидний сурталчилгааны кампанит ажил ямар нөлөө үзүүлэх бол?
iOS 14.5 Facebook болон Instagram сурталчилгаанд хэрхэн нөлөөлөх вэ?
Фэйсбүүк сурталчилгаа хийдэг хүмүүсээс асуугаад үзээрэй. 4 -р сарын 26-наас хойш сурталчилгааны үр дүн буурсан гэж хариулах болов уу.
Энэ шинэчлэл Facebook-ийн хувьд ч тун эмзэг сэдэв болоод байгаа бөгөөд Нью-Йорк Таймс гэх мэт томоохон хэвлэлүүдээр Apple-ийн энэхүү алхамыг эсэргүүцэж байгаагаа илэрхийлсэн бүтэн хуудас сурталчилгааг нийтлэснээс гадна хэрхэн хариу арга хэмжээ авах талаар дэлгэрэнгүй зөвлөгөөг ч хэрэглэгчдэдээ зориулан гаргасан.
Дээр дурдсанчлан, 14.5-н шинэчлэл Facebook сурталчилгааны Зорилтот хэрэглэгчдийг онилох, Үр дүнгийн тайлан, Сурталчилгааны оновчлол гэсэн 3 зүйлд нөлөө үзүүлж байгаа.
Эдгээрийг нэг бүрчлэн тодруулбал:
Targeting – Зорилтот хэрэглэгчдийг онилох
Retargeting, Lookalike Audience- Дахин онилох болон ижил төстэй сегмент нь Фэйсбүүк сурталчилгааны дэвшилтэт хамгийн чухал функцууд байсан бол энэхүү шинэчлэлийн улмаас бүрэн ажиллах боломжгүй болж байгааг мэргэжилтнүүд онцлож байна.
Дахин онилох функцын хувьд ойлгомжтой iOS хэрэглэгчдийн дийлэнх нь үйлдлийн бүртгэл хийхийг хязгаарласан энэ нь дахин сурталчилгаа хүргэх зорилтот хэрэглэгчдийн тоог эрс багасгах хүчин зүйл болж байгаа.
Өөрөөр хэлбэл та вэб хуудсанд хандсан хэрэглэгчдэдээ дахин сурталчилгаа хүргэх замаар Retargeting хийдэг бол тэр хүмүүсийн тоо буурсан байх магадлалтай гэсэн үг.
Нөгөө талаас, вэб хуудас дээрх Facebook Pixel ашиглан бүрдүүлдэг жишээ нь вэбээс худалдан авалт хийсэн хүмүүсийн мэдээлэл дээр тулгуурлан бүрдүүлдэг Lookalike буюу Ижил төстэй хэрэглэгчдийн мэдээлэл ч оновчтой байхаа больж магадгүй. Өөрөөр хэлбэл нь мэдээллийн эх сурвалж нь бүрэн гүйцэт биш учраас үүсгэж буй Ижил төстэй хэрэглэгчдийн мэдээлэл ч өмнөх шигээ чанартай, оновчтой биш байж магадгүй гэсэн үг. Энэ нь сурталчилгааны үр дүнд сөрөг нөлөө үзүүлэх боломжтой.
Үр дүнгийн тайлан
Facebook сурталчилгааны үр дүнг Facebook Pixel-н хувиргалтын үзүүлэлтүүд болох ROAS, CPA гэх мэт үзүүлэлтүүдээр хэмждэг. Харин iOS 14.5 гарснаас хойш энэ үзүүлэлтүүд өндөр алдаатай гарах магадлалтайг мэргэжилтнүүд сануулж байна.
Түүнчлэн Apple-н зүгээс Private Click Measurement (PCM) протокол нь iOS 14.5 дээр хэрэглэгчдийн өгөгдлийг 3 хоногийн хоцрогдолтой хүргэнэ гэж мэдэгджээ. Энэ нь бас сурталчилгаа явуулж буй хүмүүсийн хувьд Facebook Ads Manager дээрх үр дүнг дутуу гаргах, гажуудуулах зүйл болох нь тодорхой.
Homestead Studio хэмээх агентлагийн ажилтан Zach Stuck “Фэйсбүүк өмнө нь борлуулалтын 95 орчим хувийг тайландаа тусгаж чаддаг байсан бол одоо Shopify болон Facebook-н тайлан 57% -ийн зөрүүтэй гарч байна.” гэжээ.
Сурталчилгааны оновчлол
Алгоритмын тусламжтайгаар Фэйсбүүк төлбөртэй сурталчилгаа өндөр оновчлолтой байдгийг бид мэднэ. Ерөнхийдөө бидний явуулж буй сурталчилгааны үр дүнгээс алгоритм мэдээлэл авч сурталчилгаа хүргэх дараа, дараагийн хүмүүсийг илүү оновчтой сонгодог гэж болно.
iOS 14.5 танилцуулагдснаар энэхүү оновчлол үр дүн багатай болох магадлалтай. Гол шалтгаан нь Apple-н зүгээс хийсэн бас нэгэн шинэчлэл нь Facebook сурталчилгаа хийж буй маркетерүүдийг 1 вэб дээр үүсгэх “Conversion Event буюу Хувиргалтын үзүүлэлт “-г 8-р хязгаарлах болсон нь алгоритмын оновчлолд цөөн төрлийн мэдээлэл хүргэх сөрөг нөлөөтэй. Энэ нь бага хэмжээний төсөвтэй тэр хэрээрээ сурталчилгааны үр дүнгээс алгоритмд өгөх өгөгдөл багатай жижиг бизнесийн хувьд илүү их сөрөг нөлөө үзүүлэх болно.
Хэдийгээр олон муу мэдээ хүргэсэн ч сурталчилгаагаа үр дүнтэй болгох аргачлалууд бий гэдгийг ч мөн дуулгах нь зөв байх.
Хэрэгтэй холбоос:
Дижитал маркетингийн онлайн сургалтанд бүртгүүлэх бол энд дарна уу.
Сурталчилгааны үр дүнг дээшлүүлэхийн тулд хийх шаардлагатай 5 зүйл
iOS 14.5-с шалтгаалан гарах магадлалтай асуудлуудаас урьдчилан сэргийлж заавал хийх ёстой хэд хэдэн зүйлс бий.
1. Домэйнээ баталгаажуул
Өөрийн домэйныг баталгаажуулж амжаагүй бол энд байгаа зааврын дагуу яаралтай баталгаажуул. Ингэснээр та хууль ёсны бизнес эрхэлдэг гэдэг дохиог Facebook-т өгөх бөгөөд сурталчилгааны асуудал гарвал Фэйсбүүкийн зүгээс тусламж авах боломжтой болгох юм. Түүнчлэн сурталчилгаанд ашиглаж буй вэб холбоос дээрээ засвар хийх ч боломжтой болно.
2. Facebook дээрх оролцоог дахин онилох сурталчилгаандаа ашигла
Хэдийгээр тодорхой хязгаарлалтууд бий болсон ч Facebook өөрийн платформ дээрх хэрэглэгчдийн талаарх маш их мэдээллийг цуглуулдаг хэвээр байгаа. Жишээ нь танай нийтлэсэн пост, контентийг сонирхсон, үзсэн эсвэл Facebook хуудастай ямар нэг байдлаар харилцаа үүсгэсэн хэрэглэгчид, танай нийтлэсэн видеог үзсэн эсвэл сурталчилгаа дээр дарсан хүмүүсийн талаарх мэдээлэл Facebook-т бий.
Танай вэб дээрх хэрэглэгчийн үйлдлийг бүртгэх боломж нь хязгаарлагдсан ч Фэйсбүүкийн өөрийнх нь анхдагч өгөгдлийг ашиглах боломж байсаар байгаа.
3. Цоо шинэ сегмент үүсгэх аргыг эрэлхийл
Танай вэб дээрх Facebook Pixel-н дамжуулж буй өгөгдөл дээр үндэслэсэн Lookalike буюу ижил төстэй сегмент шаардлага хангах хэмжээний биш болсон бол цоо шинэ эх үүсвэр хайж эхлэх нь зөв. Мэргэжилтнүүдийн санал болгож буй сонирхолтой шийдлүүдийн нэг нь болох тодорхой нөлөөлөгчдийн Audience-г ашиглан Lookalike Audience үүсгэх аргыг туршиж үзэж болно.
4. Сурталчилгааны бүтээлч байдалд анхаарал хандуул
Зорилтот сегмент оновчтой бүрдүүлэх боломж хязгаарлагдмал бол сурталчилгааны үр дүнг дээшлүүлэх хамгийн сайн арга сурталчилгааныхаа чанарт анхаарах гэнэ шүү. Бүтээлч байдал, текст дээр анхаарахаас гадна unboxing видео, хэрэглэгчийн сэтгэгдэл гэх мэт шинэлэг төрлүүдийг ашиглаж эхэлээрэй. Түүнчлэн A/B тест гэх мэт дэвшилтэт функцуудыг туршиж үзэх нь зүйтэй гэнэ.
5. Conversions API -г тохируул
iOS 14.5 шинэчлэл гарснаар Facebook Pixel -н үр дүнгийн хэсэгт асуудал их гарах болсон үүний хамт Facebook-н зүгээс Conversions API-г шийдэл болгон гарган тавьсан. Энэ нь хэрэглэгчийн төхөөрөмжөөс биш харин шууд вэб байршиж буй серверээс үр дүнгийн мэдээллийг Facebook рүү илгээх боломжтой болгосон. Хэрэв та вэб хөгжүүлэлтийн талаар тодорхой мэдлэгтэй бол энэхүү зааврын дагуу Conversion API-г тохируулах нь шинэ нөхцөл байдалд танд хэрэг болох шийдэл шүү.
Уншигч таны хувьд iOS 14.5 шинэчлэл ямар асуудлууд дагуулж ирсэн, та хэрхэн шийдэж байна? Өөрийн туршлагаас бидэнтэй хуваалцах бол манай сошиал медиа хуудсаар дамжуулан бидэнтэй холбогдоорой. Баярлалаа. Дижитал маркетингийн онлайн сургалтанд бүртгүүлэх бол энд дарна уу.
