Хэрэглэгчийн худалдан авалтын замнал: Маркетерүүдийн мэдэх ёстой зүйлс
Хүмүүс ямар нэг бүтээгдэхүүн үйлчилгээг худалдан авахдаа тухайн бүтээгдэхүүн өөрт ямар хэрэгтэй, яагаад худалдан авалт хийх ёстойгоо ухамсарлаж, бүтээгдэхүүн үйлчилгээний талаар судалгаа хийсний дараагаар худалдан авалт хийх эсэхээ шийддэг. Худалдан авалт хийхэд тухайн хүний зорилгоос эхлээд, сэтгэл хөдлөл, мэдрэмж, амьдралын хэмнэл, зан үйлийн онцлог гээд маш олон зүйл нөлөөлдөг байна. Та ч мөн өөрт ямар ч хэрэггүй, огт сэтгэгдэл төрүүлээгүй бүтээгдэхүүн үйлчилгээг гэнэтийн шийдвэрт тулгуурлан авч байсан нь хэд вэ?
Ялангуяа онцгойрсон хямд үнийн санал амлаж чадахгүй бүтээгдэхүүнийг хүмүүс худалдан авах шийдвэр гаргах явц нь судалгаа, үнэлгээнд тулгуурлан гаргадаг. Гэхдээ нөгөө талаасаа тухайн мөчид худалдан авалт хийх онц шаардлагагүй байсан бүтээгдэхүүн, үйлчилгээг сошиал медиа орчинд түгээгдсэн контентыг хараад үнэхээр надад хэрэгтэй зүйл байна гэж ухамсарлах явдал ч бий шүү дээ. Тэгэхээр дижитал маркетер бид үүн дээр л анхааран ажиллах хэрэгтэй байгаа юм.
Мэдээлэл тоо томшгүй урсгал бүхий сошиал медиа орчинд хэрэглэгчийн 67% нь худалдан авалт хийхийн өмнө тухайн бүтээгдэхүүн үйлчилгээний талаар мэдээллийг онлайнаар авсан байдаг бөгөөд хамгийн үнэ цэнтэй мэдээлэл өгч, бүтээгдэхүүн, үйлчилгээ нь итгэл төрүүлэн, харилцаа холбоо үүсгэж чадсаныг нь сонгодог байна.
Мөн түүнчлэн худалдан авагчийн хувьд маркетингийн 7-ийн дүрэм буюу ядаж 7 удаа танайхтай харилцаа холбоо үүсгэж, бүтээгдэхүүн, үйлчилгээний талаарх мэдээллийг авсаны дараа сонголтоо хийдэг аж.
Маркетинг гэдэг хэзээд зөв цагт, зөв хүнд, зөв мэдээлэл хүргэж бүтээгдэхүүн үйлчилгээ зарж борлуулах үйл явц байсан. Одоо ч хэвээрээ. Зөв хүнд гэдэгт хэнд гэдгээ маркетингийн үүднээс дэлгэрэнгүй ойлгож, маркетингийн персона гаргах тухай хөндөгддөг бол зөв цагт зөв мэдээлэл хүргэнэ гэдэг худалдан авагчийн замналын үйл явцтай холбогддог.
Хэрэглэгчийн худалдан авагчийн замнал гэж юу вэ?
Хэрэглэгчид өдөр бүр маш олон сурталчилгааны материалаар бөмбөгдүүлдэг. Үүний үр дүнд тоо томшгүй бараа бүтээгдэхүүн үйлчилгээний мэдээлэлд ханаж, өргөн сонголттой болжээ. Энэ нь маркетер бидний зорилтот худалдан авагчийн төлөөх тэмцлийг хурцатгаж, илүү оновчтой, илүү зорилготой мэдээлэл түгээхэд анхаарах хэрэгтэй болж байна.
Сошиал медиа орчин хэрэглэгчдийг дахин онилж, ре-маркетинг хийх, хүн ам зүйн үзүүлэлт, сонирхолоор нь бүлэглэн сегментчлэх гэх мэт маркетингаа амжилттай хийхэд тустай бүрэн боломжыг бидэнд олгодог. Гэхдээ энэ нь зорилгогүй, зөвхөн сонирхол л татах олон контент нийтлээд болчихно гэсэн үг биш. Өөрөөр хэлбэл танай контент олон LIKE, Share, Comment авах нь бидний ажлын нэг жижиг хэсэг болохоос гол зорилго бус болжээ. Харин тухайн хүнд тохирсон бүтээгдэхүүн үйлчилгээний мэдээллийг үнэ цэнтэйгээр худалдан авалтын замналд нь тохируулан сэтгэл зүй, хүсэл сонирхолд нь нийцүүлэн хүргэснээр маркетингаа борлуулалт болгож, жинхэнэ утгаар сошиал медиа маркетинг явуулж чадна.
Товчхондоо худалдан авалтын замналыг зөв тодорхойлсноор өөрийн бүтээгдэхүүн, үйлчилгээгээ хэрэглэгчид хэрэгтэй үед нь хэрэгтэй мэдээллээр дамжуулан байнга сануулан, холбоо тогтоож, сонголтыг нь хялбаршуулж, өөртөө татах үйл явцыг хэрхэн төлөвлөхөө ойлгоход тустай.
Худалдан авалт нь онолын хувьд
- Хэрэглэгч асуудлаа анхаарах буюу маркетеруудын хувьд зорилтот сегментийн анхаарлыг татах үе
- Хэрэглэгч асуудлаа таних буюу маркетеруудын хувьд зорилтот сегментийн асуудлыг таниулах үе
- Хэрэглэгч асуудлаа шийдэхээ хүсэх буюу маркетеруудын хувьд асуудлын шийдлийг зааж өгч, худалдан авалтанд урин дуудах үе
- Худалдан авалт
- Үнэнч хэрэглэгч бий болгох буюу ре-маркетинг хийх үе шаттай байдаг.
Гэхдээ хэрэглэгч энэ 5 үе шатаар дэс дараалсан дардан замаар явж, анхаарал нь татагдангуутаа, асуудлаа анзаарч, шийдлээ ойлгоод үнэнч хэрэглэгч болчихдог уу гэвэл ҮГҮЙ. Үе шаттай, зөв давтамжтай контент хэрэгтэй. Гэхдээ мэдээж тэднийг залхааж болохгүй.
Энэ онолын дагуу манай байгууллага чатботын үйлчилгээг санал болгоход зорилтот сегментийн анхаарлыг татахаар Яг одоо Facebook Messenger Chatbot-той болох 10 шалтгаан нийтлэл бичиж байсан. Энэ нь нийт масс манай байгууллагыг сонирхох болно гэсэн хүлээлт, төсөөллөөс илүүтэй манай үйлчилгээнүүдийн нэг болох чатботын талаар сонирхож байгаа хүмүүсийн таниж авах, анхаарлыг татах гэсэн оролдлого юм. Нийтлэлээ бичихдээ хэрэглэгчийн анхаарлыг татахын тулд чатботын үйлчилгээнд тохируулан гаргасан персонагийнхаа дагуу хэрэглэгчийн хамгийн их хэрэглэдэг үг, ярианы өнгө аяс, мэдээлэл авч болох сувгийн онцлогийг харгалзан үзсэн.
Бид нийтлэлийн төгсгөлд үнийн санал авах холбоос холбож өгсөн бөгөөд үнийн санал татаж авсан хүмүүс рүү 3 үе шаттай и-мэйл явуулсан.
Эхний хоёр и-мэйл нь зорилтот сегментийн асуудлыг таниулахад чиглэсэн. Эхний и-мэйлээр бид
- Та хэрэглэгчиддээ цаг тухайд нь хариу өгч амждаг уу?
- Дахин давтагдсан энгийн асуултанд хариу өгөхөд хэт их цаг зарцуулж байна уу?
- Өмнө холбогдсон хүмүүст хэрэгтэй мэдээллийг нь өгөх шаардлага гардаг уу?
гэсэн 3 асуулт тавьсан бөгөөд энэ нь тухайн харилцагчид шууд хамааралтай байж өөрийнхөө асуудлыг хэн нэгний эсвэл ямар нэг байгууллагын үгээр биш өөрөө ойлгоход тустай байсан тул үр дүнтэй байж чадсан. Энэ и-мэйлдээ бид Танай бизнест тус болох Facebook Messenger Chatbot-н 4 функц нийтлэлээ холбож өгсөн бөгөөд нийтлэлийнхээ төгсгөлд мөн л энэ үйлчилгээний үнийн санал авах хэсгийг оруулсан.
Харин удаах и-мэйлээр тухайн харилцагчийн асуудал гэхээсээ илүү сүүлийн үеийн тренд, сошиал медиа маркетеруудын анхаарах ёстой өөрчлөлтийн талаар оруулж, та ч мөн энэ өөрчлөлтөд арга хэмжээ авахгүй бол үр дүнд хүрч чадахгүй байх аюул бий гэдгийг харуулсан. Түүнчлэн байгууллагынхаа бот руу нэвтрэх хэсгийг холбосноор дараа дараагийн сурталчилгааны материал хүргэх боломжийг бүрдүүлсэн.
Харин сүүлийн и-мэйлээрээ бид чатбот ашиглалтад оруулснаар ямар боломж эдэлж байгаа талаар харилцагчийнхаа бодит жишээг оруулсан бөгөөд энэ нь танд ч мөн асуудлаа шийдэх боломж бий гэсэн мессежийг өгч худалдан авалтад урин дуудсан. Энэ нь худалдан авалтын замналын талаар эхний ойлголт өгөхүйц маш товч жишээ юм. Харин маркетер бид ажлаа илүү үр дүнтэй болгохын тулд энэ талаар илүү дэлгэрэнгүй судлах хэрэгтэй.
Сошиал медиа маркетингт худалдан авалтын замнал яагаад хэрэгтэй вэ?
Бүхий л байгууллагууд зорилтот хэрэглэгчийнхээ хэрэгцээ шаардлагыг мэддэг гэж үздэг. Үнэхээр хэрэглэгчдийн хэрэгцээ шаардлага байхгүй гэж үзсэн бол хэн ч бизнес эхлүүлэхгүй шүү дээ. Гэхдээ ингэж үзэх нь өнөөгийн мэдээлэлд ханасан, хэрэглэгч хэт олон сонголттой болсон бизнесийн орчинд төсөөлөл төдий л зүйл юм. Өөрөөр хэлбэл сошиал медиа орчинд маркетинг хийж, борлуулалтаа нэмэх хүсэлтэй бизнес эрхлэгч манайхыг хаа нэгтэйгээс, хэзээ нэгэн цагт олоод, уулзалт товлон, тэр өдрөө шууд гэрээ байгуулж, манайхтай насан туршдаа хамтран ажиллана гэж төсөөлж байгаагаас өөрцгүй хэрэг. Заримдаа бизнес эрхлэгч, маркетерууд бид асуудлыг хэтэрхий том зургаар харж, хэрэглэгчдийг тэдний нүдээр бус, бизнесийн нүдээр тодорхойлон, цогц хүн гэдгийг мартах хандлага бий.
Үүнийг л зөв, цэгцтэй, ойлгомжтой зохион байгууллахад худалдан авалтын замнал гэгчийг нарийн зураглах хэрэгцээ шаардлага тулгарч буй юм. Түүнчлэн худалдан авалтын замналын нарийвчласан зураг гарган, түүнийгээ шинэчлэн сайжруулж ажиллах нь танай зорилтот бүлэг яг хэн бэ, юу сонирхдог, танай бэлдсэн контентоос алийг нь илүүд үздэг, тэдэнд манай ямар үйлчилгээ хэрэгтэй байгаа, яагаад биднийг сонирхохгүй байна, бид юуг сайжруулах хэрэгтэй байна гэдгийг бидэнд илүү сайн ойлгуулж өгдөг.
Худалдан авагчийн замналыг хэрхэн зураглах вэ?
Зорилгоо тодорхойл
Худалдан авалтын замналын зураглал гаргах хамгийн эхний шатанд эхлээд та өөрөөсөө яагаад, юунд энэ зураглал хэрэгтэй билээ гэж асуугаарай. Замналын эцсийн цэг нь хаана хүрэх, хэн энэхүү замналаар замнах талаар сайтар ойлгоход худалдан авагчийн персона хэрэгтэй болно. Энэхүү хэрэглэгчийн дүр төрхийг тодорхой гаргаснаар худалдан авалтын замналын үе шат бүр илүү тодорч харагдах ёстой.
Персона үүсгэж, тэдний зорилгыг тодорхойл
Персона хэрхэн үүсгэх, юуг анхаарах, хаанаас эхлэх талаар бидний бэлтгэсэн BUYER PERSONA буюу ХУДАЛДАН АВАГЧИЙН ПЕРСОНА ГЭЖ ЮУ ВЭ? МАРКЕТИНГТ ХЭРХЭН АШИГЛАХ ВЭ? нийтлэл болон “ИНТЕРНЭТ МАРКЕТИНГИЙН ТАЛААР А-Я” цахим номноос уншаарай. Хамгийн эхний ажил судалгаа хий. Хэдийгээр персона гэдэг танай зорилтот хэрэглэгчийн хагас зохиомол дүр боловч бодит хэрэглэгчийнхээ мэдээлэлд тулгуурлан гаргах нь хамгийн зөв. Тэгэхээр та бодит хэрэглэгчдээсээ доорх асуултуудыг асуугаад үзээрэй.
- Манай байгууллагын талаар хаанаас сонссон бэ?
- Манай вэб рүү хамгийн анх хандуулсан зүйл юу байсан?
- Бидэнтэй хамтран ажилласнаар хүрэх зорилго юу вэ? Өөрөөр хэлбэл ямар асуудал шийдэх гэж байна?
- Манай вэбд хэр хугацаа зарцуулж мэдээлэл авдаг вэ?
- Манайхаас худалдан авалт хийсэн үү? Хийсэн бол шийдвэр гаргахад нөлөөлсөн гол хүчин зүйл юу байв?
- Манай вэб рүү худалдан авалт хийхээр хандсан боловч, худалдаж авалгүйгээр орхиж байсан тохиолдол бий юу? Хэрэв тийм бол яагаад, юу нөлөөлөв?
- 1 -с 10 оноо өгвөл та манай вэбийн үйл ажиллагаанд ямар оноо өгөх вэ?
- Бидэнтэй холбогдож тусламж авах хэрэг гарсан уу? Гарсан бол хэр сайн туслалцаа үзүүлсэн бэ 1 -с 10 онооноос сонгон дүгнээрэй?
- Таны ажилд тус болох биднээс хамаарсан зүйлс юу байна?
Эдгээр асуултын хариу таны персонагаа илүү сайн ойлгож, тодорхойлоход тус болох болно.
Харилцааны цэгүүдийг тодорхойл
“Харилцааны цэг” гэдэг нь хэрэглэгч танайхаас ямар нэг зүйл худалдан авахаасаа өмнө, худалдан авах үедээ эсвэл дараа нь танай байгууллагатай холбогдож, харилцаж буй бүхий л харилцааг хэлж буй юм. Харилцааны цэгийг маш өргөн утгаар харах нь танай ажилд эерэг нөлөө үзүүлнэ. Өөрөөр хэлбэл онлайн, офлайн маркетингийн мэдээллээс эхлээд танай ажилтантай биечлэн уулзах, утсаар ярих гэх мэт бүхий л харилцааг багтаасан харилцааны цэгүүдийг тодорхойлж, жагсаалт гарган анхааралдаа авах шаардлагатай. Энэ нь хэрэглэгчдээ ойлгож, тэднийг сэтгэл хангалуун байлгахад тус болох сайжруулалтууд хийх гол суурь материал болох болно. Худалдан авагчийн замналыг зураглах тун чухал үе шатын нэг юм шүү.
Учир нь танай хэрэглэгчид яг ямар үйлдлүүд хийж байна гэдгийг харилцааны цэг танд ойлгуулж өгдөг. Хэрэв танай хэрэглэгчид таны төсөөлснөөс цөөхөн харилцаа үүсгэж байвал энэ нь тэд богино хугацаанд танай вэбийг орхиж байна (танайхыг сонирхохоо больж байна) гэсэн үг үү? Эсвэл хэрэглэгчид тань төсөөлснөөс илүү олон харилцааны цэгүүдийг дамжиж байгаа бол танай вэб (эсвэл танайхаас худалдан авах процесс) хэт ярвигтай, олон үйлдэл шаардаад байгааг харуулж байна уу? Аль нь ч байсан эдгээр харилцааны цэгүүдийг тодорхойлох нь худалдан авагчийн замналыг зураглахад тун чухал мэдээллийг танд өгөх болно.
Үйлдлүүд
Танайхтай харилцах үед хийж буй хэрэглэгчдийн үйлдэл бүрийг жагсаа. Үүнд Google-ийн хайлт хийхээс эхлээд и-мэйлийн холбоос дээрх даралт гэх мэтийг багтаасан уртаас урт жагсаалт гарч ирнэ. Хэт урт байх нь асуудал биш. Хэрэглэгчээ ойлгож, тулгарч байгаа асуудлыг нь засварласнаар жагсаалтаа багасгах боломж гарна шүү дээ. Хамгийн чухал нь хэрэглэгчид хэт олон үйлдэл хийх шаардлага гараад байгаа эсэхийг олж харах хэрэгтэй. Энэ төвөгтэй урт замыг багасгах нь танай борлуулалтыг нэмэгдүүлэх ач холбогдолтой.
Сэтгэл хөдлөл болон Сэдэл
Маркетинг бол учир шалтгаан болон үр дүнгийн холбоос. Хэрэглэгчийн үйлдэл бүр сэтгэл хөдлөлөөр сэдэлжиж байдаг бөгөөд тухайн сэтгэл хөдлөл нь тэд худалдан авалтын замналын аль шатанд байгаагаас хамааран мөн өөрчлөгддөг.
Гэхдээ бид зорилтот хэрэглэгчийнхээ сэтгэл хөдлөлийг тодорхой хэмжээгээр удирдаж чадах уу гэвэл тийм. Ер нь маркетер бидний ажил хэрэглэгчийн сэтгэл хөдлөлийг удирдаж, бүтээгдэхүүн үйлчилгээгээ тухайн хэрэглэгчийн оюун санаа, сэтгэлзүйд суулгах шүү дээ. Ингэхийн тулд хэрэглэгчийн үйлдэл бүрийн шалтгаан болсон сэтгэл хөдлөлийг үүсгэгч “хөндүүр цэг” буюу асуудлыг ойлгох хэрэгтэй. Энэхүү хөндүүр цэгүүдийг нь олж мэдэх нь тухайн хэрэглэгчийг худалдан авалтын замналын дагуу залах зөв контентыг яг цагт нь хүргэхэд туслах зүйл.
Асуудал ба хөндүүр цэгүүд
Танай хэрэглэгчийг хүсэж буй зүйлээ хийхэд юу зогсоогоод байгааг юун түрүүнд мэдэх хэрэгтэй. Жишээ нь хамгийн гол асуудал зардал, үнэ байж болно. Хэрэглэгч танайхаас ямар нэг зүйл худалдаж авахаар шийдлээ гэж төсөөлье. Гэхдээ хэт өндөр хүргэлтийн зардлаас болоод больчихож болно. Эсвэл хүргэлтэнд хэт удаан хугацаа шаардах бол. Яг энэхүү асуудлыг л тодруулж мэдэж авснаар та шийдэх арга замыг эрэлхийлэх боломжтой болно.
Худалдан авагчийн замналын 4 төрөл
Замналын энэ 4 төрлийн алийг нь сонгох нь танай байгууллагын зорилгоос хамаарах болно.
Одоогийн нөхцөл байдал
Энэ нь хамгийн өргөн хэрэглэгддэг худалдан авагчийн замнал. Танай хэрэглэгчийн яг одоо танай байгууллагатай харилцахдаа туулдаг зам, хийдэг үйлдэл, сэтгэл хөдлөл бүрийг зурагладаг. Худалдан авалтын замналын энэ төрөл худалдан авагчийн замналыг сайжруулах хамгийн чухал нөхцөлийг хангаж өгдгөөрөө онцлогтой.
Хэрэглэгчийн нэг өдөр
Худалдан авагчийн замналын энэхүү төрөл нь хэрэглэгчийн өдөр тутамдаа хийдэг үйлдэл, сэтгэл хөдлөлийг зурагладаг. Энд зөвхөн танай байгууллагатай харилцах биш харин өдөр тутмын бүхий л харилцааг нь энд авч үзэх нь чухал. Учир нь хэрэглэгч бол хувь хүн шүү дээ. Хэрэглэгчийн нэг өдрийг ойлгосноор тэдний амьдралыг илүү ойлгож, тэднийг асуудлыг гүнзгий мэдэхэд тустай. Худалдан авалтын замналын энэ төрлийн онцлог нь хэрэглэгчдийн хэрэгцээг нь тэднийг мэдэхээс өмнө мэдэж авах.
Ирээдүйн нөхцөл байдал
Хэрэглэгчийн хувьд танайхтай харилцахдаа ямар үйлдэл, бодол, сэтгэл хөдлөл гаргах бол гэсэн таны төсөөллийг зурагладаг. Гэхдээ үүнийг гаргахдаа одоогийн нөхцөл байдал дээр тулгуурлан ирээдүйд ямар болгохоор төлөвлөж байгаагаа зураглах хэрэгтэй. Худалдан авалтын замналын энэ төрлийг байгууллагын алсын хараа, зорилгыг тодорхойлоход хэрэглэж болно.
Үйлчилгээний зураглал
Энэ төрлийг дээрх 3 төрлийн аль нэг дээр тулгуурлах гаргах хэрэгтэй бөгөөд замналын үе шат бүрт нөлөөлж буй хүн, бодлого, технологи болон процессийн хүчин зүйлсийг нэмж зурагладаг. Одоогийн худалдан авагчийн замналын үндсэн шалтгааныг гаргаж, сайжруулах арга замыг тодорхойлоход үйлчилгээний зураглал маш хэрэгтэй.
Дараагийн алхам
Худалдан авагчийн замналаараа өөрөө замна
Замналыг зураглаад ажил дуусчихлаа гэсэн үг биш. Хамгийн гол ажил нь дүн шинжилгээ хийх. Хэдэн хүн танай вэб рүү хандаж байгаа мөртлөө худалдан авалт хийлгүйгээр гарч байна. Хэрэглэгчийн үйлчилгээгээ хэрхэн сайжруулж болох вэ? гэх мэт асуултын хариуг та олж мэдэх ёстой. Өөрөөр хэлбэл хэрэглэгчийн хэрэгцээ хангагдахгүй байгаа газрыг олж тогтоох нь хамгийн чухал юм. Ингэснээр хэрэглэгчдэд танай байгууллага тэдний асуудлыг шийдэх гарц, шийдэл мөн гэдгээ илүү тод харуулах боломжийг олж авна.
Гэхдээ юмс бидний бодож байгаа шиг байдаггүй шүү дээ. Тиймээс та өөрөө л энэ гаргасан замналынхаа дагуу замнаж үзэх хүртэл таны гаргасан замнал онолын төдий л зүйл байх болно гэдгийг анхаараарай. Өөрийн биеэр бүтээгдэхүүн үйлчилгээгээ туршиж үзээгүй маркетер хэзээ ч сайн маркетинг хийж чадахгүй гэдэг үг ч бий.
Шаардлагатай өөрчлөлт оруул
Хэрэглэгчийнхээ туулдаг замналаар замнах нь шаардлагатай өөрчлөлт хийх мэдээллийг танд өгнө. Том жижиг ямар ч өөрчлөлт байсан эдгээр нь хэрэглэгчийн хөндүүр цэг, асуудлыг шийдэхэд тус болоход чиглэсэн байх ёстой. Жишээ нь энгийн хэрэглэгчийн нүдээр харахад бүтээгдэхүүн бүрийн тайлбар дутуу байж магадгүй. Учир нь бид өдөр болгон тухайн бүтээгдэхүүн, үйлчилгээний дотор байсаар бидэнд манай бүтээгдэхүүн хамгийн ойлгомжтой зүйл мэт харагддаг болчихдог.
Худалдан авагчийн замналыг зураглах нь таамагаар өөрчлөлт хийхээс илүү хэрэглэгчийнхээ хэрэгцээ, асуудлыг тодорхойлсны үндсэн дээр өөрчлөлт оруулахад тус болно. Түүнчлэн энэхүү замналын зураглал нь байнгын сайжруулалт хийгдэх ёстой ажил гэдгийг анхаараарай. Сар, улирал тутам дахин эргэн харж, сайжруулах өөрчлөлтүүдийг тусгаж байх нь зүйтэй.
Харилцааны цэг болон персонаг төлөвлөгөөтэйгөө холбох нь
Манай хэрэглэгчдийн хувьд өдөр тутмын ажилтай нь асуудал нь хамааралтай байдаг тул аль хэдийнэ асуудал байгааг анзаарчихсан байдаг.
Ингээд асуудлаа танихыг тулд манай хэрэглэгч хайлт хийж эхэлдэг. Энэ хайлтад бид өртөхийн тулд хэрэглэгчийн хамгийн их хэрэглэдэг үгнүүд болох сошиал медиа, сошиал маркетер, төлөвлөгөө, чадвар зэргийг ашигласан мөн асуудалтай нь холбосон дараах контентуудыг бэлдсэн.
- Сошиал хуудсандаа контент бэлтгэх төлөвлөгөө
- Сошиал маркетерууд эдгээрийг туршаад үзээрэй. Таны ажлыг хөнгөвчилнө
- Сошиал хуудсаа амжилттай ажиллуулахаар шулуудсан бол үүнийг туршаад үз
- Эдгээрийг мэдсэнээр контент бүтээх асуудал биш зэрэг нийтлэл бичсэн.
Гэхдээ хайлтын системд өртөхөд бүхнийг найдаад өнгөрөөнө гэдэг тийм ч зөв биш. Тийм учраас Google-ийн сурталчилгаа явуулдаг. /Google сурталчилгааны талаар бид дэлгэрэнгүй мэдээллийг та бидний бэлдсэн Google Ads нийтлэлээс аваарай/
Сурталчилгаагаар манай бэлдсэн нийтлэл хайлт хийхэд хамгийн эхний илэрцүүдэд харагдах бөгөөд тухайн хэрэглэгч манай нийтлэлийг уншиж, дараагаар нь бидний бэлдсэн цахим номыг татаж авах бөгөөд татаж авахдаа мэйлээ үлдээх болно.
Ингээд бид тухайн хэрэглэгчийнхээ персонад зориулан тухайн худалдан авалтын үе шаттай холбоотой и-мэйл маркетингийн ажилдаа ордог. Тодорхой давтамжтай хэрэглэгчийн персонад үндэслэсэн таамаглал бүхий мэйлүүд явуулах бөгөөд шийдвэр гаргах худалдан авалтын шатанд ирсэн гэж таамаглаж буй хэрэглэгчид мэйл явуулахдаа бид үнийн санал авах хэсэгтэйгээ уяж өгдөг. Ингэснээр тухайн хэрэглэгч манайхыг мартахгүй бөгөөд манай веб рүү дахин хандалт хийх магадлал нь өндөр байдаг.
Ингээд бид үнийн санал тохиролцож, борлуулалт хийж чадвал өмнөх асуудал таниулсан контентуудэд бус үнэнч хэрэглэгч болсноор тухайн харилцагч ямар үнэ цэн олж авах тал дээр анхаарлаа хандуулан ажилладаг.
